الفرقة صعبة

فرقاك صعبه إنت ما أقدر أفترق, أنا نصي منك, تعيش في قلبي, و لا أنساك.

تعرف كيف صورتك ما أنساها, و لا صوتك, و لا ريحة دواك, كانت تميز أول من تفتح باب غرفتك تفوح الريحة فالممر.

ما أقدر أوصفلك حالتي الحين من بعد ما رحت, كل من أتذكر أبى الدنيا تردني للورا, أبى أركضلك, أبي أشوفك, كل من أتذكر الذكريات تألمني بس هذي هي الحياة, أتألم بس أسكت, كم بكيت من شوقي لك, كم مره أبي أصرخ عشان أكلمك, و الله إني أحس حياتي تبدلت, أحاول أعيش نفسي للأفضل من رغم الألم إلي لاحقني, أباك تكون قربي, من أشوف صورتك أتأمل فيك,  ما أقدر إني أقعد أشوف صورتك كمرور الكرام لازم أتأمل لو شفته.

مشتاقه لحنينك, مشتاقه إني أقعد أقرا قصة من إلي إنت كنت تحبهم. من أسمع الأغنية إلي إنت كنت تدمع عشانه أقعد أدمع بعد, لأن أتذكرك صح إني ما أذكر شو إلي صارلك لأن كنت أربع سنين بس أعرف إنك كنت تدمع و إنت تسمع الأغنية.

أسفة لأني قصرت فيك, ووايد بعد قصرت, كل من أتذكر أدمع, قلبي كان قاسي, و الندم ما ينفع بعد فوات الأوان.

فقدتك يا أعز الناس, فقدت شوفتك و إني أقبل إيدك و راسك يا جدي,  لكن إنت الحين في مكان مرتاح, مع حبيبتك و أهلك إلي فقدتهم إلي شفتهم و إلي ما شفتهم, سلم على جدتي, صح إني ما شفتها عمري, بس سلم عليها, تبقى هي شخص محفورة في قلبي رغم إني ما شفتها, بس تبقى في قلبي مهما كان.